Deustuko Unibertsitateko Ingeniaritza Fakultatean – Trastea.clubean, STEAM (Zientzia, Teknologia, Ingeniaritza, Artea eta Matematika) trebetasunak ikasgelan indartzeko helburuarekin konprometituta jarraitzen dugu. Horretarako, orain arte 13 prestakuntza-ekintza antolatu ditugu 2024/25 ikasturtean zehar, Haur Hezkuntzako, Lehen Hezkuntzako eta Bigarren Hezkuntzako irakasleei zuzenduta.
2025eko martxorako, sei hezkuntza-zentrotako, hainbat Ikasgiltza-eskoletako eta Elhuyar Fundazioko kideetako 350 hezitzaile baino gehiagok parte hartu zuten prestakuntza-saio hauetan. Ardatz nagusia Pentsamendu Konputazionala ikasgelan txertatzea izan zen, hezkuntza-zentro eta erakunde bakoitzaren beharretara eta ezaugarrietara egokituta.
Elhuyar Fundazioaren kasuan, prestakuntza programek arreta berezia jarri diote Bizilabe gazteentzako ikerketa zentroetan Pentsamendu Konputazionalaren erabilerari, zientzia eta teknologiaren ikaskuntza sustatzeko baliabideak eta metodologiak aztertuz.
Bestalde, eskoletan, Pentsamendu Konputazionalaren oinarriak definitzen eta ulertzen jarri dugu arreta. Irakasleekin lan egin dugu ikasgeletan dagoeneko gauzatutako jarduerak identifikatzeko, kontzeptu hauekin lotuta. Gainera, Pentsamendu Konputazionalarekin lan egiteko baliabide praktikoak eman ditugu, teknologiaren erabilerara mugatu gabe. Deskonektatutako informatika baliabideen eta mahai-jokoen bidez, irakasleek ikuspegi hau hezkuntza etapa desberdinetan txertatzen ikasi dute.
Eskerrak eman nahi dizkiegu hezkuntza-zentro guztiei eta parte-hartzaile bakoitzari Trastea.clubengan jarritako konfiantzagatik, baita prestakuntza-saio bakoitzean erakutsitako dedikazio eta inplikazioagatik ere.
